باستنظرك
باستنظرك
رغم القساوة في منظرك
لحظة هروبك يارباب
م الحب لما استنصرك
باستنظرك
باستنظرك رغم الشتا
والبرد والرعد المخيف
باستنظرك
في الشارع المشغول
بأوحال الرصيف
أنا أصلي حاسب موعدك
وعارف اللي بيبعدك
وأنا اللي خابر تبقي مين
وأنا اللي صابر من سنين
وباعدلك بالثانية عمري
وأعدلك مطرح في بستان الأمل
وبامدلك
وفي كل خطوة بامدلك
إيدي اللي شققها العمل
مدي الخطاوي يا حبيبتي وقدمي
وإن كنتي خايفة م الطريق اتبسمي
يا شمس ياللي ضحكتك
قمر ينور سكتك
انا اللي عشقك عزنى
وانتِ عشقي يستتك
باستنظرك
باستنظرك
يا جرحى يا حلمي العنيد
باستنظرك
باستنظرك
يا مصر يا حبي الوحيد
وحتيجى يوم وتصدقي
عشقي الأصيل وتحققي
حلمي الجميل وتزوقي
عمر اللي ضاع مستنظرك
باستنظرك
