هنا القاهرة

هنا القاهرة الساحرة الآسِرة الهادرة الساهرة الساترة السافرة

هنا القاهرة الزاهرة العاطرة الشاعرة النيّرة الخيّرة الطاهرة

هنا القاهرة الساخرة القادرة الصابرة المنذرة الثائرة الظافرة

صدى الهمس في الزحمة و الشوشرة

أسى الوحدة في اللمة و النتورة

هنا الحب و الكدب و المنظرة

نشا الغش في الوش و الإفترا

هنا القرش و الرش و القش و السمسرة

هنا الحب و الحق و الرحمة و المغفرة

و انا ف قلب دوامتك الدايرة بينا

بصرّخ بحبّك يا أجمل مدينة

يا ضحكة حزينة .. يا طايشة و رزينة

بحبّك و اعفّر جبيني في ترابك

و اعيش في رحابِك و أقف جنب بابك

جنايني أروي بالدم وردة شبابك

يا زينة جنينة حياتنا اللعينة

بحبّك بحبك يا بنت اللذينا

بحبّك

يا حلوة يا بلدنا

حبيبتي من ضفايرها طل القمر
و بين شفايفها ندى الورد بات
ضحكتها بتهز الشجر و الحجر
وحنانها بيصحي الحياة في النبات
حبيبتي بتعلمني احب الحياة
من حبي فيها حياتي شمس و ربيع
و الحب في الدنيا دي طوق النجاة
لولاه يضيع قلب المحب الوديع
يا حلوة.. يا بلدنا.. يا نيل سلسبيل
بحبك انتي رفعنا راسنا لفوق
لو الزمن ليل مايرهبنا ليل
شوقنا فـ عروقنا يصحي شمس الشروق
الحلوة قلب كبير.. يضم الولاد
و زاد و زوادة.. و ضلة و سبيل
الموت و الاستشهاد.. عشانها ميلاد
و كلنا عشاق ترابها النبيل
حبيبتي من تنهيدها حن الحجر
غنت سحر صوتها الشجر و النخيل
بتعلم النجم البعيد السهر
وساب سماه وسرح في موجك يا نيل
حبيبتي غنوتها غيطان الحنان
شموسة صافيه نورها ماينطفيش
ف حضنها بنرتاح و نلقى الأمان
ونعيشه حتى ان موتنا ليها نعيش
....يا حلوة يا بلدنا