بطلت الشعر


بصي يا ستي .. أنا بطلت أألف شعر

يعني يصح ؟ أحرق نفسي وأحزق شهر ..

علشان خاطر أزوق سطر ؟

توء توء توء.. انسى يا عمرو !

مانا لو عايزة أحبك ممكن..

أبعت وردة اتنين أو عشر !

وكمان ممكن أقولك نكتة

أو أسبّلك وأدّيها فشر

ولا أقولك ندّيها سينما ؟

ونصيع برة لوش الفجر ؟

إنما أرجع أحس بقلبي ؟

فات الوقت وعدى ومر

طلع الكرش وداس ع القلب

هم الدنيا أهو سرق العمر

بالي ما عادش يطوّل باله

وتقولي شعر وحبة صبر؟

فوتي عليا كمان كام حبة

ماتش الأهلي بعد العصر

Ben Azzam

October , 23-2007

حالة غربة

حالة غربة .. أيام صعبة

مشتاق حبة ومخنوق حبة

مسروق عمري في بلد الهسّة

!لف الحظ وعندي استغبى

ضحكوا عليا وقالوا اتعلم

!علشان تنجح إنسى أوروبا

!حاسس إني ف فيلم خيالي

! فرخة وداست فوقها الدبّة

***

حالة غربة .. أيام صعبة

مخنوق حبة ومشتاق حبة

بلدي بتهرش قلبي بحرقة

جوى ف دمي الأشواق دايبة

أمي ما فارقت لحظة خيالي

!وبقيت خال في الغربة يا شابة

وساعات هي تهف عليا ..

ذكرى لأجمل حدوتة خايبة ..

***

حالة غربة .. أيام صعبة

نفسي أقرّب منكم حبة ..

واحشاني بلدي بشكل يجنن

وبعيد عنك معدتي قالبة ..

حتى الحزب الوطني واحشني

!نفسي ف حاجة أشتمها محبة


September 1, 2007