بطلتي ليه تيجي تزوريني في المنام ؟؟
قلبي قسي ولا أنا نسيت الآلام ؟؟
يكونش أنا بطلت أحس ؟؟ أو باحس اني تمام ؟؟
ولا الزمن من غفلته فكرني هانسي إني يتيم
زمن غشيم..
شوقي إليكي مستديم
لو حتى عشنا ألف عام
محتاج إليكي ع الدوام
***
لكني مضطر أرسم ضحكة صفرا للبشر ..
وألّم قلبي واطويه في علبة من حجر
وامشي بحالي ..
انشالله امشي للقمر ..
ماهو أصلهم قالوا لابد من أنه يمشي
كم حد فينا يابني راح ..والكون ميوقفشي
بيصبروني ويطمنوني.. ويكذبوا في وشي
شمسك خلاص غاب ضيها ..
هيفيد بإيه تاني الكلام ؟؟
****
بس الحقيقة إن أنا مكسور
عقلي عامل نفسه عاقل واحتوى حزن البحور ..
لكنه رافض يعترف أنك خلاص
نفضتي عن روحك وجع الجسد والناس
وأنك يا ست النسا بقيتي ست الحور
لسه أنا مسحور
باضحك وباتكلم واعيش وأنا ميت الأحساس
عايش صحيح إنما ..بمشاعر الأصنام
.******
لكني أول ما الليل يميّل
باخلع قناعي وارجع اكلمك
اناجي صورتك واصحي فيا العيّل
واحلم بطيف ضحكتك ..
فين دنيتك ؟
فين الحنان اللي اتخلق في لمستك
فين ابتسام ؟
دمع الولد نازل هدد في حطان شعوري بالحياه
روحي و راحت.. واللي فاضل مني دمعة ويا آه
دا هو نفسي أنا ولا أنا بقيت مجرد اشتباه ؟؟
يطلع عليّا الصبح تاني
وأرجع البس وش تاني
عشان أمثل الاهتمام
***
متزعليش
ومتغيبيش
يعني أنا موحشتكيش؟
طب ياللا ساعديني أعيش
طلي عليا من سماكي كل ليلة
واحضني روحي اليتيمة.. العليلة
نفسي يا امّا في ضمة تشفي
هي يعني ديا حاجة مستحيلة ؟
أبوس إيديكي
واسند عليكي
واقعد في حجرك وارتوي من نور عينيكي
واستني دعوة بيها تتحقق الأحلام
أديني ياللا نمت بدري عشان أشوفك
طلي أوام
طلي بنور الجنة وياّ أسراب الحمام
كفاية إني بقيت يتيم في دنيتي
بلاش كمان أكون يتيم أنا في المنام
----
13-2-2010
Ben Azzam
