بحب البرد

بحب البرد
و يا سلام لو حد هرب م الدوشة
و راح و جابلي ورد
و أموت م الفرحة و الدهشة
لو كتبت قصيدة
و قولتلي : " حلوة
قولها تاني"
اتنطط زي العيال الصغيرين
وأقولّك إحلف
والله العظيم
بتتكلم بجد؟
يمكن عشان أيام الفرح قليلة
و سهل تتعد
عارف؟
رغم إن المخازن
كل يوم بتتحرق
و مفيش حساب ولا جرد
و رغم وجود السيرك
والأراجوز
و التلات ورقات
وجوز و فرد
عمري ما اتمنيت أكون أمير
أو ولي عهد
لكني بأحلم بوطن
مفيهوش ولا حارة سد
وطن بيفرح بحاجة
غير وصول الأهلي لليابان
و حزنه أنبل
م الدموع البلاستيك
و عمليات التجميل
و الشفط و الشد
عارف؟
رغم إنها بتقع
بتغرق
بتتنيّل بستين نيله
لكن جميلة
و عمرها ما هاتتهد
عشان كدة
انا لسه بأحب حاجة
و لسه ف قلبي حد

__________________
علي سلامة