هل تسمعني

هل تسمعني ؟

بقلم علي سلامة

-----------------------

1-

ألو ألو..
هل تسمعني؟!
بكلم حضرتك من قدام..
فرن الحاج أبوصلاح..
كله سعادتك تمام..
والشعب مستمر ف الكفاح..
لا يا فندم مفيش قلق..
شوية كسور وكدمات..
واللي مات مات..
واللي راح راح..
الحمد لله زي الفل..
ويا رب ديماً..
من نجاح لنجاح..
معايا يا فندم..
ورحمة أمي مبسوط ومرتاح..
كله من خير سعادتك..
إحنا بس محتاجين خميرة بيرة..
لأ يا فندم.. بيرة إيه
أستغفر الله..
هو أنا بتاع كده..
أكلم حضرتك بعدين بقي..
عشان تقريباً الكارت خلص..

2-

ألو ألو..

هل تسمعني..

بكلم معاليك..

من محطة أبوغريب..

هو يا فندم القطر..

اللي لا بيودي ولا بيجيب..

العتمة الكتمة..

الزحمة الكئيب..

الشعب..

ماله الشعب..

فرحان وإحساسه عالي..

وكل الحالات بتستجيب..

معانا يا فندم..

أجزخانة لكل مواطن وطبيب..

مرهم للحروق..

ورحمة أمي بعت أجيب..

طب يا فندم عشان القطر اتحرك..

الموت علينا حق يا فندم..

واللقا نصيب..

3.

ألو ألو

هل تسمعني

بكلم جنابك

من عزبة شحات العريان

دي حتة كده يا فندم

بعيدة عن العين

لكن قريبة من حلوان

مفيش ميه يا فندم..

لكن مفيش حد عطشان

نور

ملوش لزوم النور يا فندم

كفاية الإحساس بالأمان

أنا

ورحمة أمي زي الفل

مناخيري

لأ.. ده دور برد من زمان

الشعب

مبسوط وبيغني وفرحان

ما هي مصر حضرتك

إمبارح كسبت السودان

طب يا فندم

عشان تقريباً البيت بيقع

لا إله إلا الله

4.
ألو ألو..
هل تسمعني..
بكلم معاليك م المستشفي..
آه والله العظيم..
تصور..
كبد البلد سليم..
ووشها منور..
قطن وشاش..
لأ يا فندم ما يلزمناش..
ده الشعب كله متعور..
دكاترة..
أشعة..
تحاليل..
ده ترف يا فندم..
أوامر سعادتك..
ورحمة أمي هادور..
رسم قلب..
عارفة يا فندم..
بتاع طويل كده ومدور..
بعد إذن حضرتك يا فندم..
جالي كرشة نفس..
تقريبًا بموت..
الدوام لله يا فندم.

5.

ألو ألو..

أوطي صوت التليفزيون إزاي يا فندم..

ده أنا بتكلم من سوق الخضار..

طول عمرها القوطة مجنونة سعادتك..

بس الجديد بقي الخيار..

والبطاطس..هايصة خالص..

عشان الزيت أسعاره نار..

والكوسة شكلها يفرح..

ماشفتهاش أبدا كده..

والشمس طالعة..وف عز النهار..

المواطن.

.نفس الابتسامة العريضة حضرتك..

هيموت م الفرح..

خصوصا بعد ما سمع..

عن علاج البواسير بدون جراحة

..إمبارح ف نشرة الأخبار

..المشكلة أنا يا فندم

..من يومين كده..

ابتدي يلعب ف عبي..

ييجي مليون فار..
--------
6-
أيوه يا فندم..
بكلم سعادتك م الاستاد..
عارف يا فندم إن المباراة مذاعة..
بس قلت أشيل علم..
وأفسح الولاد والجماعة..
أنا..
أهلاوي يا فندم..
ورحمة أمي عن قناعة..
الأهلي حضرتك..
مش إجوان بحرفنة وشجاعة..
الأهلي رغيف العيش..
أنبوبة البوتاجاز..
والسد العالي..
اللي بيحمي مصر من المجاعة..
هو البطل..
هو عم توفيق التمرجي..
اللي بيدي حقنة ف العضل..
ينام الألم كام ساعة..
مصدر الفرح الوحيد للشعب..
والزمالك أكيد..
مقدر الظرف الصعب..
تصور الموقف يا فندم..
لو الأهلي ماعندوش قلب..
أو بعد الشر بعد الشر..
اللاعيبة عضهم ف رجليهم كلب..
وراح الدوري والكاس..
قوللي بقي سعادتك..
هاتفرح بإيه الناس..
طبعًا الزمالك..
هايعمل م القصيدة دي شماعة..
وكل مرة يتغلب ستة..
وهات م الشبكة يا معلم..
طب يا فندم
أكلمك بعد الماتش..
--------
7-

آلو آلو..

عقبال أولادك يا فندم..

بكلم سعادتك من فرح هاي هاي..

ف فندق خمس نجوم..

لأ ورحمة أمي..

أنا مش معزوم..

ولا قريب العروسة..

ولا من طرف المرحوم..

أنا جاي مع ابن خالتي..

شاب زي الورد..

بيشتغل ف الأمن..

وخريج علوم..

رقاصة..؟

فيه سعادتك..

بس مؤدبة يا فندم..

وبترقص وهي لبسة الهدوم..

فيه سعادتك حلويات..

وعيش طري..

وبتاع كده بشنبات..

بيقولوا عليه جمبري..

ينقطع لسان الكداب المفتري..

اللي يقول علينا شعب جعان..

أو مش لاقي ياكل..

أو محروم..

طب يا فندم سعادتك سهران شوية..

عشان بس البوفيه خلاص..

والناس إبتدت تقوم

-------
8-
لو آلو..

أيوه سعادتك..

معاك يا فندم..

أنا أصلي بتكلم م الميكروباص..

زي الفل ورايقة وحلوة الناس..

يا فندم انت اللي سعادتك بقيت حساس..

هي إيه العبارة..

دي معاليك مش زحمة..

ده ونس..

دي تقريباً مصر كلها..

واقفة ف الإشارة..

يا فندم قلنا كتير..

كل مواطن قبل ما ينزل م البيت..

يصلي صلاة استخارة..

المواطن..

أهو بيضحك قدامي أهوه..

وزي الفل ومبسوط..

ما هو لما يموت..

في ميكروباص ع الكورنيش..

أشيك بكتير برضه..

من الغرق في عبارة..

لأ يا فندم مش أنا اللي بصوت..

دي المدام..

اللي قعدة قدام تقريباً بتولد..

الله أكبر يا فندم هلت البشارة..

طول عمرك يا مصر ولادة..

وتاريخ..

ومجد..

وحضارة..

بعد إذن سعادتك..

الآنسة اللي جنبي يا فندم..

تقريباً بتحبني..

آه ورحمة أمي..

كل شوية تقوللي..

دمك خفيف شربات..

يا اسمك إيه..

يا واد انت..

يا سمارة..

مع إني أبيض يا فندم..

بس ها نعديها سعادتك..
-------------

-9-

لو ألو..

بكلم جنابك..

من هيئة الأرصاد..

حالة من الطراوة سعادتك..

بتسود البلاد..

حر ?..

بعد الشر يا فندم..

ورحمة أمي دي موجة..

بس جت بدري شوية..

قبل المعاد..

يا فندم الجو لطيف..

ومن بكرة هانلبس خفيف..

صافي يا فندم صافي..

بس الرؤية معدومة..

إحنا كده يا فندم..

أي حاجة نقول الحكومة..

المواطن..

اسكت اسكت..

اتعلم الشقاوة..

وبيعمل إضراب..

وبيتكلم عن الفساد..

وبيقول كفاية..

ألو ألو..

أيوه يا فندم..

إنت معايا..

ألو..

يا نهار أسود..

ده الموبايل فاصل..

هو أنا كل ده بكلم نفسي..

يللا بقي كل شيء نصيب

---------
10-

ألو ألو..

هل تسمعني..

بكلم معاليك م الطريق الزراعي..

لأ يافندم..

دي مش نمرتي..

ولا ده..

الموبايل بتاعي..

حاجة تفرح سعادتك..

ده تقريبا مصر كلها..

مزروعة برسيم..

طول عمرنا أصحاب حضارة..

ونقدر البهيم..

نعم يافندم..

قمح..

سنابل..

قطن..

إحنا هانعيده تاني سعادتك..

ونرجع للعصر القديم..

نعم حضرتك..

أزمة..

مين قال كده يافندم..

كداب ف أصل وشه ولئيم..

آي..

ده أنا سعادتك..

لمؤاخذة الحمار رفصني..

ف مكان حساس..

متقلقش خالص سعادتك..

أنا زي الفل وسليم..

ورحمة أمي مش تعبان..

طب يافندم أكلم حضرتك بعدين..

عشان الراجل صاحب الموبايل قلقان

----
11-
آلو آلو
هل تسمعني
بكلم سعادتك
من غرب السكة الحديد
ناس تقول ده وجه قبلي
وناس تقول عليه الصعيد
لا يا فندم ده فركة كعب
بس لسه بعيد
المواطن؟!
علي حطت إيدك يا فندم
ورحمة أمي سكر
زي ما سيبته
ومفيش جديد
فيه سعادتك ضحكة حلوة بس ما اتخبطش لسه
ف واحد سعيد
أنا؟!
زي الفل
الواد ابني
نجح بتفوق سعادتك
حتة ملحق صغير ف الرياضة بس تقريبا ها يعيد
طب يا فندم
عشان بتكلم م السنترال
وسعر الدقيقة
كل شوية بيزيد
مستورة سعادتك والحمد لله

----
12-

آلو آلو

هل تسمعني

لأ يا فندم أنا مريح شوية

بكلم سعادتك م البيت

حماتك بتحبك يا فندم

بسم الله سعادتك معانا

طب سندوتش صغير

يعني ورحمة أمك إتغديت

يا فندم نبض الشارع واضح

باين ف شكل الغدا حضرتك

سعادتك الطبيخ نفس

مش لحمة وفرخة وسمك

وسمن وزيت

إيه يا فندم

ملوخية بالأرانب

يا ريت سعادتك يا ريت

حمام محشي

سمك مشوي

جمبري

والحلو أم علي

حرام علي سعادتك

إرحمني ريقي جري

أنا خلاص

قفلت الصفحة دي من زمان وانتهيت

طب يا فندم عشان مراتي خايفة ع الكارت يخلص

ورحمة أمي ما قالت حاجة

ده أنا لوحدي اللي حسيت.

---


13-

آلو آلو..

هل تسمعني..

عارف بكلم سعادتك منين..

حزر فزر كده يا فندم..

لا يا فندم فرن إيه..

ورحمة أمي بكلمك م الأوبرا..

عرض روسي..

أيوه سعادتك باليه..

حلاوة وشقاوة ورشاقة..

أقول إيه بس يا فندم..

ولا إيه..

أهي فسحة برضه سعادتك..

أتفرج..

وأحاول أفهم اللي أقدر عليه..

لا يا فندم معايا دعوة..

الواد ابن اختي جدع أوي..

ويعرف سيد بيه..

مشكلة صغيرة بس يا فندم..

سمحوا بدخول العيال..

وأنا والجماعة لأ..

مش عارف ليه..

طب يا فندم..

أنا ف قسم قصر النيل..

آه هو قصر النيل..

مش كده يا باشا..

---
14-

آلو آلو..

هل تسمعني..

أيوه يا فندم..

أنا تقريبًا ف الهو..

بكلم سعادتك من ع الحدود..

مفيش هنا أي حاجة يا فندم..

بس الجودة برضة ف الموجود..

لا يا فندم..

المواطن هنا..

قماشة تانية خالص..

لا مدرسين ولا مدارس..

ولا أمل ولا وعود..

بس ابتسامة الرضا..

والسعادة كلها بقي..

عارف سعادتك الإحساس..

بأن الطريق مسدود..

أنا..

لا يا فندم أنا أعيش..

ف أي مكان..

أنا ابن ناس ومدلع..

سعادتك ما تعرفش..

إني آخر العنقود..

ماتشغلش بالك..

معايا ورحمة أمي..

يا فندم كفاية الجو الروحاني..

والقمر..

والصحرا..

يمكن أحتاج بس أجرة السكة..

لو فيه نصيب..

وهانعود..

طب يا فندم..

السلام أمانة بقي..

----
15-

آلو آلو..

أيوه سعادتك..

سامعني كده كويس..

صوتي!

زي الفل يافندم..

بس تقريبا م الخضة..

لسه محبوس..

أصلي حلمت إمبارح..

حلم حلو أوي..

بس زي ما يكون كابوس..

لأ خير سعادتك..

واحد طويل وعريض وكبير..

بقوله إنت مين..

قاللي أنا عذاب الضمير..

كتم نفسي..

وفضل يضغط ويدوس..

مع إني عمري..

ما أذيت حد ورحمة أمي..

ده أنا كل اللي بعمله..

إني بهدي النفوس..

حتي لما محفظتي اتسرقت..

قلت المهم الرقم القومي..

وف ستين داهية الفلوس..

لا يافندم..

أنا بنام ع الكنبة..

اللي ف أوضة الجلوس..

بطانية؟!

عندي سعادتك..

ماركة جبهالي من بره..

ابن خالتي..

الأستاذ محروس..

لا يافندم شقاوة إيه..

أنا؟!

معقول؟!

خلبوص؟!

لأ يافندم..

إنت مخ سعادتك..

راح لبعيد أوي..

قال شقاوة قال..

-----
16-

آلو آلو..

أيوه يا فندم..

أنا بكلم سعادتك من دمياط..

نفسي هفتني ع المشبك سعادتك..

وبالمرة نشوف جهاز البت جمالات..

عقبال أولادك..

دخلتها اتفشكلت يجي سبع مرات..

لأ يا فندم سوء تفاهم بسيط..

مين يا فندم..

أنا؟!

عروسة جديدة..

تاني..

ونرجع إيه سعادتك..

اللي فات..

هو ينفع يرجع؟!

شربات..

ورحمة أمي شربات..

طب ياريت سعادتك..

توطي صوتك شوية..

الحكومة جنبي سعادتك..

لأ يا فندم..

أنا قصدي مراتي..

أصل هي اللي معاها الميزانية..

والميه والسندوتشات..

إيه يا فندم..

مصانع إيه..

أسمدة..

غازات؟!

لامؤاخذة مش واخد بالي سعادتك..

بس عموماً..

إحنا طول عمرنا..

جدعان أوي مع الخواجات..

طب يا فندم..

عشان جمالات بتضرب العريس..

بسيطة ورحمة أمي..

يا نهار أسود..

ده الواد تقريباً مات..

----
17-

آلو آلو..

هل تسمعني..

أيوه يا فندم..

أنا بتكلم من وزارة البيئة..

ياريت سعادتك..

ندخل ف الموضوع..

ماعدش في الكارت..

ولا دقيقة..

إيه يا فندم..

الهوا..ماله الهوا..ما هو زي الفل..

والميه..

ورحمة أمي بريئة..

إيه سعادتك..

المواطن..

قدامي أهو زي القمر..

وارد سعادتك..

يقع من طوله..

قضاء بقي وقدر..

إيه يا فندم..

الدنيا مخنوقة..

ما جايز سعادتك فيه حريقة..

طب يا فندم..

بعد إذن سعادتك..

عشان تقريباً عندي إسهال..

ولو إستنيت شوية..

إحتمال..

تبان الحقيقة..

----
18-

آلو آلو..

هل تسمعني..

أنا بكلم سعادتك..

من فوق السطوح..

إيه يا فندم..

بتفرج علي إيه..

منظر إيه..

الغروب..

لأ يا فندم..

ده أنا بظبط الدش..

عشان بشوف الصورة

لمؤاخذة بالمقلوب..

لأ يا فندم..

أنا والأستاذ سيد..

ده جاري وحبيبي..

تصور سعادتك..

أول مرة أشوف مصر

من فوق السطوح..

جميلة سعادتك..

بس تحس إنها لسه..

ف مرحلة البث التجريبي..

يا ساتر..

يا ساتر يارب..

ملعون الدش..

ع التليفزيون..

ع الصورة..

لا يا فندم سعادتك متقلقش..

ده الأستاذ سيد..

والطبق..

والماسورة..

وقعوا من فوق السطوح..

إيه يا فندم

لأ ده إحنا ف الدور العاشر..

الدوام لله سعادتك..

---

19-

آلو آلو..

هل تسمعني..

لا مؤاخذة سعادتك..

معلش..

أنا آسف ع الإزعاج..

طلبتك بالغلط..

اتفضل سعادتك..

إرتاح..

لأ يا فندم ما استغناش..

ده أنا كنت بدور علي روحي..

لكن ملقيتهاش..

زي ما تقول كده جنابك..

محتاج أتكلم مع نفسي..

لكن لا اسمي متسجل..

ولا الرقم مكتوب..

اعذرني سعادتك..

إن كنت قلقتك..

أو صحيتك م النوم..

غلطة والله غلطة..

أنا كده سعادتك..

لكن مين فينا خالي من العيوب..

لا يا فندم..

أنا كويس ورحمة أمي..

يمكن أكون حنيت لروحي..

ناويت أتوب..

أو حبيت أتكلم مع قلبي..

وأقوله سامحني..

أنا اللي علمتك..

تبيع الورد ف الإشارات..

وسيبت الدنيا تحدفك بالطوب..

وأنا اللي قلتلك معلش..

عديها..

يا بخت من بات مغلوب..

أنا آسف..

واعذرني سعادتك..

طلبتك بالغلط..