سلامات

من كتر الحزن

-----

من كتر ما الحزن رطرط..
مبقاش خلاص يتحس..
فضلت الأحلام..
تتقص تتقص تتقص..
لحد ما بقت ف النهاية..
رغيف..
وكيس بلاستيك.
وبس..
عارف..
بصحي قلبي..
عشان يحب..
قام بقرف..
واتلفتلي وبص..
ورجع نام تاني..

-------------------

ثقافة

-------

فيه ناس لما تضايق

تملا البانيو وشوية بخور

وشمع ومزيكا وأغاني

أو تروح تحكي وتاخد وتدي

مع طبيب نفساني

أو تطلع شرم الشيخ تاني

ودي ثقافة..

وفيه ناس لما تتخنق

ترجع تقلب ف اللي فات

وتجيب الصور والذكريات

وتاخد جوافة وبلح أمهات

وتروح تزور الميتين ف القرافة

ودي ثقافة..

وفيه ناس تلم العيال

وربع لب ونص سوداني

وفيلم قديم لإسماعيل ياسين

أو نجيب الريحاني

أو تعدي ع الحلواني

وكيلو مشكل وتكتر الكنافة

ودي برضه ثقافة

لكن الكل مجروح..

ونفسه يبوح..

بس مش عارف..

****


ورد وشمع
--------

جابت ورد وشمع..

وظبطت الإف إم..

وطفت النور..

وقالتلي..

وأنت معايا بتحس بإيه..

قلتلها ولا حاجة..

قامت.. ولعت النور

وراحت غابت حبة..

ورجعت سألتني برقة..

طب لما بغيب عنك..

بتحس بإيه..

قلتلها برضه ولا حاجة..

قالتلي بجد..

قولتلها أمال هزار..

قالتلي..

والنيلة الأغاني اللي بتكتبها

والزفت الأشعار..

قلتلها بس أمي قالتلي..

اللي بيكدب بيروح النار..

بصتلي من فوق لتحت بكل احتقار..

وقالتلي

ابقي خللي أمك تنفعك..

----------

إيه الحلاوة دي
______

معلش اسمح لي..

لو هانتكلم عن الحلاوة..

أنا تقاطيعي مجرمة..

صحيح وداني كبيرة..

لكن مناخيري منمنمة..

وكل ما أطلع سلمة..

يقولولي شد حيلك..

لسه بدري ع السطوح..

عيوني جريئة..

جريئة..

لكن في الحقيقة..

لا بتعرف تداري..

ولا بتقدر تبوح..

شعري صحيح مش ناعم..

لكن لايق علي راسي..

ولما يصدق إحساسي..

معرفش فين من روحي أروح..

بحبك لما بتستعبط..

وتقوللي مالك..

بتبكي ليه..

ومن إيه كده قلبك مجروح..

يا عم روح..
--------------


وش القفص
______

علي فكرة..

إحنا يادوب بس الشوية..

اللي علي وش القفص..

بدل وكرافتات..

وكام شارع ومدارس لغات..

أما القعر..

لا دقن..

ولا شنب..

ولا شعر..

ولا أوصاف..

اطلع واتفرج يا معلم ع الأطراف..

عندنا قري وشوارع وبيوت..

كل دقيقة بتموت..

لا ميه ولا نور..

ولا حلم ولا رجل ولا لحاف..

اتفرج يمكن تتخض..

ولو لسه بتحس بجد..

أكيد هاتخاف..

-----

طبق اليوم

______

الطاجن ده زمان..

كان بيتعمل باللحمة الضاني..

والنهارده يا جدعان..

بقي فيه فكر تاني..

أولاً الطاجن ملوش لزوم..

ومش محتاجين لحوم..

كل الحكاية..

اكتب ورايا..

ربع لمونة..

وفصين توم..

وشعار البرنامج..

الجوع صحة..

وعلي الله تصحي..

يا وطن م النوم..

أي استفسار..

حد عايز يتخانق..

يتنفس..

يتكلم..

يبرطم..

أنا علي قهوة سعد رزة..

بجوار حسن كاوتش..

أمام مستشفي المقطم..

أشوفكم الحلقة الجاية

----------

عصير فراولة

____

يا عم أبوس إيدك..

فيه أمل..

ولا حتي احتمالات ضعيفة..

أنا مش بقولك..

ترجع البيضة تاني بتعريفة..

ولا الانتخابات الجاية..

تبقي مية المية نضيفة..

ولا أتقابل أنا والوزير..

ف نفس الطابور..

بدون حرس وأمن وتشريفة..

ولا لما أدخل القسم..

يقولولي ف خدمتك يا مواطن..

ويجيبولي عصير فراولة..

مع ابتسامة لطيفة..

عارف..

هموت وأعرف مين..

بيسرق مني الغطا..

وأنا نايم بالليل..

بجد حركة مش ظريفة..

بس بيني وبينك..

دي غلطتي..

حد يسيب الشباك مفتوح..

ف عز الشتا..

وينام كده بهدوم خفيفة..

حصل خير..

-----

زي الجن
___

ساعات كده بعيد عنك

يجيلي كرشة نفس

وألم ف المعدة

ودربكة ومغص

وساعات أحس

إني شوية أمراض

محطوطة ف قفص

بس ماشي الحال

وساعات من غير سبب

أجري ع الحمام

ويجيلي برد وزكام

وساعات أسهر

وساعات م العصر أنام

وساعات ألاقي

صعوبة ف الكلام

وده تقريباً طول السنة

وساعات أحس

إني مش أنا

بس زي الجن

فاكر اسمي واسم مراتي

وأسامي العيال

وعلي طول بقي

جسمي مكسر ومهدود

صحيح باكل وأشرب

واضحك والعب

بس مش موجود

ومعرفش ليه عيني بترف

عمال علي بطال

هو أنا عندي إيه يا دكتور

--------

غسيل قلوب

---

هي القلوب بتتغسل..

زي الهدوم..

وإزاي بتغرق ف الغرام..

وإزاي تعوم..

وإزاي بتبقي طوق نجاه..

وبتبقي شط..

وإزاي بتنخل الكلام..

وإزاي بتعرف أي خط..

وإزاي بترقص م الفرح..

وإزاي بتقتلها الهموم..

وإزاي بتبكي وتبتسم..

واشمعنا يعني بتترسم..

فوق الشجر..

ساعات بتدبل ف الربيع..

وساعات بتعشق المطر..

ليه لما بتبطل غونا...

بنحس فعلا...

بالخطر...

------------

زغزغني..
--------

زغزغني يمكن أضحك..

يمكن أفرح..

يمكن أطلع ..

م اللي أنا فيه ..

زغزغني ..

يمكن أحلم ..

يمكن أغير ..

يمكن أقول اللي مخبيه ..

مش جايز..

لسه الدنيا جميلة بجد..

ولسه الناس ..

في الصيف والبرد ..

ولسه الورد ..

مش يمكن ..

يطلع فيا العيب مش فيه ..

زغزغني ..

زغزغني يمكن أصحي ..

وأقول بالبلدي..

وأقول بالفصحي..

وإياك ترجع يا بن الناصحه..

تقولي مافيش..

زغزغني يمكن ينفع..

وأرجع أسمع..

دقة قلبي تاني وأعيش..

زغزغني..

---

مفيش دقيق..
ومفيش صديق
ومفيش قمر..
عشان نشوف..
فين الطريق..
إيه يا عم الشاعر..
طريها شوية..
ومش كل اللي تشوفه..
في عينيا تقوله..
خليك جدع..
أصل الكلام صحي الوجع..
ما تيجي نضرب الودع..
هو النسيم ساب البلد دي..
ليه وطفش..
يمكن من الخوف والعطش..
معقول يكون اتباع كمان..
حتي الأمان برضه اتلطش..
يا عم أبوس إيدك.
أكتب لنا غنوة فرح..
تنفع نغنيها سوا.
طب أقولك..
تعالي نتعشا فول..
جايز يضربك الهوا..
وتفقد الذاكرة..
وتعرف تكتب..