الحِزن الوطني

الحِزن الوطني لمصلحتك .. والمستقبل ليـــك
فرخة بفحمة وحتة لحمة .. إياك يتمر فيـــك
أوضة بحالها لكل مواطن .. وكمان بالشبابيــك
وعشان مانوقفشي مصالحك.. قطرين يخبطوا بيك
***
دا الحِزن الوطني لمصلحتك .. ف الخير هيحمّيـك
***
الحِزن الوطني دا حرية .. هنطرطشها عليـــك
فكر جديد إصلاح متجدد .. بص وشوف بعنيــك
رأيك قوله ومهما تقولوا .. بكرة نجيب رجليــك
بص لحالك ربـِي عيالك.. وبلاش تعمل ديـــك
***
دا الحِزن الوطني لمصلحتك .. وده شئ مش بإديـك
***
الحِِزن الوطني لمصلحتك .. هيأمِّـن حواليــــك
شرطة وجيش وعساكر صاحية..وبوليس يضرب فيك
بلدي يا بلد الأمن يا واعية .. تقفيـش بالتلكيــك
مالوا الحبس أهو شقة تلمّك .. من نفسك نحميــك
***
دا الحِزن الوطني لمصلحتك .. وف حضنه يخبيــك
***
في الحِزن الوطني يامــحلانا ..عفاريت ف التسليك
مصر ف عينّا وخيرها ف جيبنا .. مالناش فيها شريك
أمّا الشعب فعمره قصيــــر.. وتقول هات يديّـِـك
خليك بس يا شعب ف بيتكو .. والإصلاح هيجيـــك
***
دا الحِزن الوطني لمصلحتك .. بطلوا بقى تشكيــك
***

Ben Azzam
September 14, 2006